በታላላቅ የጃዝ ሙዚቀኞች የጃዝ ሬከርድ በተሞላ ቤት ተከቦ ያደገው ጆርጋ መስፍን በጆን ኮልታሬን፣ ዱክ ኤሊንግተን፣ ካሳ ተሰማ፣ ዶ/ር ሙላቱ አስታጥቄና ጂሚ ስሚዝ ዜማዎች ውስጥ በልጅነቱ መመሰጡ ከኢትዮ ጃዝ ጋር ጥልቅ ግንኙነት እንዲኖረው መሰረት ጥሏል። ከእነዚህ መካከል ዶ/ር ሙላቱ አስታጥቄ በልዩ መልኩ ለሙዚቃ ፍላጎት  እንዲያድርበት ምክንያት ሆኗል፡፡ ጆርጋ ከሳክስፎን ጋር ያለው ቅርርብ የበለጠ ጎልቶ የወጣው በጆን ኮልታሬንና በጌታቸው መኩሪያ የሙዚቃ መሳሪያ ድምጾች ሲሆን የእማሆይ ጽጌ ማርያም የፒያኖ አጨዋወት ደግሞ የሙዚቃ ጣዕሙን የበለጠ አዳብሮለታል፡፡ 

ከልጅነቱ ጀምሮ ለሙዚቃ ያለው ፍቅር ጠረጴዛን እንደ ፒያኖ እየተጠቀመ በመጫወት የጀመረው የሙዚቃ ጉዞው በእናቱ በዶ/ር ተዋበች ቢሻው አማካኝነት በ 12 አመቱ ያሬድ የሙዚቃ ትምህርት ቤት ለመግባት ችሏል ፡፡ ጆርጋ ሳክስፎንን የመጫወት ፍላጎት ቢኖረውም በወቅቱ በኢትዮጵያ ሳክስፎን መሳሪያ ባለመኖሩ ለሁለተኛ ደረጃ ትምህርት ወደ ህንድ ሀገር በሄደ ጊዜ ነበር ከሳክስፎን ጋር የተገናኘው ፡፡ 

ጆርጋ ለሳክስፎን ያለው ፍቅር ኮሌጅ በነበረባቸው አመታት በአጠቃላይ የዘለቀ ነበር፡፡ በጊልፈርድ ኮሌጅ የመጀመሪያ ዲግሪውን ኬሚስትሪ ከዛም ደግሞ በኢሞሪ ዩኒቨርስቲ ማስተርሱን በፓብሊክ ሄልዝ በተማረ ሰዓትም ሙዚቃ መጽናኛው እንደነበር ያወሳል፡፡ ትምህርቱን አጠናቆ በመጀመሪያ በአሜሪካን የጤና ሚኒስቴር ውስጥ ይሰራ የነበረ ሲሆን በ 1999 ዓ.ም የሙዚቃ ፍቅሩ አመዝኖበት የስራ አቅጣጫውን ሙሉ በሙሉ በመቀየር የሙሉ ጊዜ ሙዚቀኛ በመሆን ሁለት አስርት አመታትን አስቆጥሯል፡፡ 

ጆርጋ በልጅነቱ የጀመረው የሙዚቃ ጉዞ እንደ ፀጋዬ ገብረመድህንና ቪጄ አየር ካሉ በርካታ እውቅ አርቲስቶች ጋር በጋራ እንዲሰራ አስችሎታል፡፡ ጆርጋ መስፍን ውዳሴ የተሰኘው የኢትዮ–ጃዝ ቡድን መስራችም ሲሆን ከፍተኛ እውቅናን ላገኘው ታላቁ ጤዛ ፊልምም ሙዚቃ አቀናብሯል፡፡ ይህም የሙዚቃ ስራው ምርጥ ሙዚቃ በሚል ዘርፍ በ22ኛው የካርቴጅ ፊልም ፌስቲቫል ላይ የተሸለመ ሲሆን ምርጥ ቅንብር በሚል ዘርፍም በ5ተኛው የዱባይ ዓለም አቀፍ የፊልም ፌስቲቫል ላይ ሽልማትን አግኝቷል